自細漢，陳心棻就會當uì鬢邊ê脈跳智覺tio̍h氣運好歹，這種感官伊號做「刺鑿」。彼時伊猶毋知這款能力佮全世界傳湠ê「鳥語傳說」有關係──原來伊是「鳥語」ê感染者，也是島內軍警勢力「總機關」現此時上要緊ê追捕對象。

到底「鳥語」暗藏啥款神祕力量，又閣按怎牽磕島內外各方勢力ê爭鬥？心棻敢有法度佮同伴走脫重重難關，走揣對自由ê向望？

台語文學新世代作家陳這，以科幻想像重寫時代寓言。語言哲學ê辯證、社會文化ê再現、島嶼現實ê虛幻投影，伊欲用新口味、新面腔向世界宣告：這就是未來ê台文科幻！

◎本作品榮獲國藝會出版獎助