半䖙半倒觀天下

──一座南方島嶼的傳奇

王羅蜜多

▎半䖙島普略

半䖙島，又名彪山島，閣有人叫伊濫肚島。是太平洋西北爿的島嶼，佇蓬萊島東爿2,700海浬，孤島釘根佇茫茫渺渺的海洋中央，是有淡薄仔神祕閣漸漸世界化的島嶼。面積大約6,000 平方公里，其中八成是山地佮崙仔，平陽主要集中佇西部沿海，地形對東爿的懸山開始，中央雄雄落差誠大，一大群無蓋懸的山崙包圍大片的山坪，加上河川沖割出來的平陽離海面無蓋濟，所以規个島嶼對坦邊看起來，就親像是半䖙倒的人抑是動物，所致號做半䖙島。閣伊東爿的第一高峰遠遠看起來，親像虎佮獅混合，拄符合古早所講「彪」的形體，號做彪山，以伊做代表，島嶼就叫做彪山島。另外較趣味的名稱，是因為島嶼中央的大片山坪誠成濫濫的腹肚，中央閣塌一窟敢若肚臍，所以有人共供體做濫肚島。半䖙島氣候佇熱帶佮亞熱帶之間，自然景觀佮生態相當豐富。人口五百外萬，超過七成集中佇西爿平陽。半䖙島族群主要有平陽族、濫肚族佮半爿族。

半䖙島誠捷落雨，大小溪河四界流，多數是對東向西，五條較長較大的主要河川，對東到西，有汫水河、肚臍溪、七星河、仙丹溪、烏溪。有的形成重要河口港，有的因為食水無夠深，另外造作海港。佇肚臍溪中央的深肚水庫，是發電佮用水的重要設施。

半䖙島因為孤自釘根佇海洋中央，參蓬萊島上接近，捷捷交往，所以伊的行政區分、政治法律、宗教文化、經濟活動、文字語言，甚至思考方式攏參蓬萊島足接近，敢若是血脈相連的姊妹國。

毋過因為時代的演變，島上誠濟人開始思考建立文化的主體性，包括宗教、政治、文化藝術、民俗傳承種種，尤其是身為海洋國家的特色。所致，多年來所發生一寡怪孽的事件，窮實佇潮流的推捒中，並無啥物奇怪。

▎神話豐沛的島嶼

平平是太平洋的小島嶼，四面海洋的國家，可能往來的未開發島嶼不計其數，也可能島民的想像力較豐富，半䖙島的神話比蓬萊島加倍濟，也加誠荒譀。比如講，𪜶的百姓普遍相信島嶼的下面有一隻大海龜，一年四季轉踅無停，而且那踅那向蓬萊島前進。根據半官方的研究報告，這種移徙每年竟然有甲1.12 公里，經過估計，較臨五千年就會徙去參蓬萊島的打狗港相接。島民多數反對去參人相接，變成別个國家的一部份，所以直直祈求海神下令，閣拜託龜神一年正轉嘛應該一年倒轉，島嶼較袂直直走徙位，卻是一直無應效。

對蓬萊島傳湠過來的，除了經常被檢討的政治、宗教、經濟問題，有一項深深影響著大眾生活的民俗文化，論生相、看命底、合八字、相生相剋種種，予𪜶感覺誠困擾也無合理。對蓬萊島傳過來十二生相牽挽佇每一个人身上，一生無法度剝開。生相的來源雖罔有附幾落套說明，不而過每一套攏予𪜶足無滿意，無法度接受。比如人人喊拍蓋討厭的動物，卻是排頭崁，故事解釋講，水牛揹貓佮鳥鼠泅過溪，無疑悟鳥鼠共貓捒落水傱去報到，結果鼠頭一名，貓排無生相，致使貓代代攏欲揣鳥鼠報仇。這款腫頷的情節，竟然講甲足滑溜。

另外，名聲是海洋國家，海底溪底的生物竟然無半隻入生相，有夠譀！有人講這是激青盲跟綴海棠國大陸文化的結果。窮實，半䖙島本身毋但飛禽野獸的傳說足濟，連蟲豸的故事嘛滿滿是，囡仔也加減會曉講。

因為動物蟲豸的神話特殊豐沛，政治人物也誠容易利用𪜶來帶動民心，爭取權力財富，甚至勢頭大甲影響全島全國。

▎創造神話佮生相革命

這个「半䖙島」的故事對斑甲開始。樹林中的斑甲早就變成市內鳥矣，四常佇徛家的露台咕咕叫，也時常行佇大街小巷捅樹子。不過佇「斑甲市」的斑甲是動物，是人，也是神。

神創造人，人創造神話，神話活靈靈佇人的生活中現身，逐件攏真甲予人不得不相信。所致「半䖙島」的故事就一件一件相紲發生，這本冊寫的是其中一小部份爾爾。不而過，毋管故事按怎發展，人物動物神明按怎變化，新的十二生相總算產生矣。

這馬「半䖙島」已經有新的十二生相矣！這十二生相包含天頂飛的、山頂走的、平地行的、水底泅的，有動物有蟲豸，有世界上大隻的佮非常細隻的。

而且𪜶的生相重再認，八字自由算，漸漸脫離世間人自作孽產生的綑縛。這種生相的大革命，誠是拍破傳統，成做自然自在的世界。

佇「半䖙島」，欲䖙欲倒據在你，一本小說提佇手，欲讀欲翻抑是欲盹龜嘛據在你。

2023年12月

佇府城北園街