話頭

硞硞行鈃鈃叫的鐵馬文學

王羅蜜多

　　退休了後，大目降的徛家留做畫室，生活重心換來府城，主要是參囡仔蹛做伙會當相照顧，而且日常生活較方便，想袂到煞成做鐵馬文學的開始。

　　葉石濤捌講過，台南是一个適合人眠夢、做工課、戀愛、嫁娶、清心過日的所在。對我來講，這个地區誠實（tsiânn-si̍t）足適合騎鐵馬寬寬仔行、目睭四界捽（sut），頭殼烏白想、拄著咖啡廳冷飲店隨意坐落來看冊寫作的好所在。

　　遮濟冬來，騎鐵馬遛遛行寫出誠濟現代詩、小說、散文，尤其有數量袂少的生活手記、觀察佮思考的文字。遮的作品四常佮相關相片，隨意囥起去面冊參文友交流，我逐時講這是現流仔，上蓋自然鮮沢的作品。

　　這本散文集內底所收集的，部份是較長篇、有掠定主題、經過營造的書寫，部份是輕安自在的現流仔，毋過攏是騎鐵馬去坐佇佮意的所在沓沓寫出來的。對現流仔摘（tiah）出來的作品，部份經過掠定主題、修改、合股，可能生湠合欉產生新嫣的一篇。

　　頭一輯「斬薰蛇」十三篇，包含人生回顧、感悟，對過身的親人佮好友的悼念，動物參人的情感，遊記、讀冊心得等等，加上一篇劇本。

　　第二輯「蜜多桑佮鐵線蕨」六篇，主體是蜜多桑佮鐵線蕨的對話，其他的也是關連植物的書寫，深入我對草木的疼心。鐵線蕨發佇我彼台足少駛出門的轎車邊仔的水溝縫，逐工出門經過攏愛請安問好，而且自從「相換名」了後，我就逐時用鐵線蕨的身份對蜜多桑敨（tháu）破心事。遮的對話連紲一冬，就共摘出來敆（kap）做一篇。

　　第三輯「府城遛遛行」十一篇，算是現流仔的綜合，寫府城古蹟、歷史現場，談論本土藝術家，對貓仔狗仔的觀察，對鳥隻的數念，閣有徛家附近溪流的情思，上尾用鐵馬鈃鈃叫（giang-giang-kiò）收煞。

　　以上三輯攏總三十篇，頭一輯主體是寫實散文，有九篇超過五千字。第二輯、第三輯多數是帶厚厚詩意、千字以內的小品文，窮實有部份已經是散文詩、奇幻劇場，無仝款的書寫變化，向望會當加添讀者的趣味。

　　前幾年佇島嶼內外佮海岸溪流行踏，相紲完成《大海我閣來矣》、《台灣阿草—台灣史蹟草木台語詩集》，海洋佮草木的歌詩永遠是唱袂離。這本台語散文集，算是延續本土情懷，注心佇台南的書寫。

　　鐵馬閣鈃鈃叫，提醒我愛出門矣，毋管是鐵馬文學、台南文學，抑是台語文學，攏愛鈃鈃叫，繼續行落去。

2023/1/11寫佇台南三分仔柴頭港溪邊咖啡店