體例說明

一、這本冊大部份攏用臺文書寫，干焦一寡「注解」，比如：「近山剉無柴，近溪擔無水。」( 注解：『反諷人佔有優勢反而不知努力，便會造成失敗』。) 佮「法律文件」，比如《教育基本法》、《國家語言發展法》等，保留一寡華語書寫。而且漢字一律採用教育部用字，拼音也是用教育部ê臺羅拼音。

二、 有必要ê 時，直接佇漢字ê 後壁注臺羅拼音，譬如：臭跤液(tshàu-khasio̍h)、關門著閂(tshuànn)、支(tsi) 肺管、坱埃(ing-ia) 佮垃儳(lâ-sâm)、雙跤走甲欲牚(thènn) 腿、有感覺咧搟(hián) ê 時間誠久、物價已經佮歐洲接軌(kuí)。

三、 若需要注音ê 字傷濟，就佇段落ê 尾後集中做注釋，譬如：

注①鼢，音bùn，對土裡鑽出來。

注②液態，音ık̍ -thāi；液體ê狀態。

注③粒徑，音lia̍p-kìng；徑，kìng，直徑tıt̍ -kìng。

四、 若需要用英文字詞做補充解說，嘛直接佇臺文字ê 後壁做補充解說，譬如『冰蓋』[ice sheet]、『聖保羅』[St Paul]、英國科學家『赫胥黎』[Huxley] 有一擺受邀請去『都柏林』[Dublin] 演講等等。

五、書寫臺文ê 數字，盡量用阿拉伯數字。譬如：1947年2月、2萬9千箍、狗頭鷹( 兀鷲) 會當活35 年。

六、若準需要直接翻譯華語ê 語詞，抑是用臺語音唸出新ê 詞語，本冊攏盡量採用文讀音。譬如，懸浮微粒，音hiân-hû-bî-lia̍p；液態，音ık̍ -thāi；粒徑，音lia̍p-kìng；直徑，音tıt̍ -kìng。

七、佇書寫方式這方面，咱原則上採用「漢羅並用」，漢字為主，羅馬字做副，並無主張愛全漢字。所以，「的」這字，若是做「連詞」「語氣詞」，咱攏用「ê 」代替，干焦「的確」佮「目的」遮ê 詞，咱會寫做「的」確、目「的」。我認為這是「漢羅並用」ê 第一步。其他比如講：kha-báng 捾咧四界走、sànn 著頂腹蓋、毋管是ho-ló 抑是客家、hőng 講甲無一塊好、伊tsua̋n-ne 跋倒⋯⋯，遮ê 語詞，咱攏用漢羅方式表示。

八、我認為，臺語文袂當干焦停留佇「生活語詞」ê 層次，欲擴大使用ê 範圍，的確就愛向「教育語詞」與「學術語詞」來行，才會愈行愈大範。所以佇論述ê 時，免不了愛直接翻讀華語詞ê 需要。語言免不了會互相影響，翻讀久就是咱ê，慣勢會變自然，直接翻讀ê 華語詞，歸尾就會 變做咱臺語詞ê 一部份矣。譬如講：拍開咱臺灣創作歌謠ê「序幕」(sūbōo)、守秩序(tia̍t-sū)、負(hū) 生長、供(kiong) 需失衡、石油耗(hònn/hàu) 盡等等。遮ê 詞若無直翻，就真歹去揣著適當ê 臺語詞。

九、另外，嘛袂因為欲強調口語化，就共「最大」一定愛講做「上大」；「我和同學」，一定愛講做「我佮同學」；「首次」嘛免一定著講「第一擺」；「人與(í) 自然」「人與(í) 社會」，嘛免一定愛講做「人佮自然」「人佮社會」。其實，「最」、「上」，兩字並用；「與」、「和」、「佮」、「參」，四字嘛插咧用。只有按呢擴展，臺語語詞才會愈用愈濟，表意ê 範圍才會愈來愈闊，嘛會像英語愈來愈大範。

十、為著體貼讀者，對變調ê 處理，必要ê 時，直接佇羅馬字面頂標數字，表示聲調變化。比如講：外籍(tsı ̍k8-4) 新娘、東倒(tó2-1) 西歪、山頂(tíng2-1) 尾溜等等語詞。

十一、對部份猶無法度用臺語音表達ê 語詞，抑是臺語界猶無共識ê 外國人ê 姓名，抑是專業名詞，咱攏直接唸出華語音，並且遵照教育部ê 規定，以雙引號『』註記，比如：予『卡特』總統失業、1863 年『林肯』佇『蓋茨堡』演講等等。