台文BONG報小說精選集（一）

商品原價 $ 300

商品售價 $ 237

數量:

作者：Babuja.A.Sidaia、Hōng-tin、A-bóng、Asia Jilimpo、Ngá-kî、洪錦田、Voyu Taokara Lâu、Tōa-thâu X、A-hi、陳明仁
編者：陳豐惠
書名：台文BONG報小說精選集（一）
ISBN：9789868291201
出版日期：2006.10

內容簡介

台文罔報雜誌社出版。本選集語言一致採用漢羅lām寫，附1片CD。

1980年代中期開始戰後新一波母語復振運動，嘛帶動台語文學創作ê發展。台語作品上大ê特色就是：In ê內容絕對kap台灣有關係，尤其是kap土地、人民有對話。但是一般平面媒體無人beh刊台文作品，尤其是有羅馬字-- ê，koh-khah無人愛。所以，台文作家為著發表作品，就陸續發行真tsē台語雜誌、期刊，《台文BONG報》嘛是其中之一，阮堅持beh做1份「台語文學專門雜誌」，無刊論理性、運動性ê文章。

台語文學是有現代化ê文學，i符合「文學現代化」二個要點：一個是「語言kap書寫一致」；一個是「以市民生活經驗kap感情為主體」，發刊佇《台文BONG報》ê作品嘛 lóng有ha̍h這二項精神。

《台文BONG報》已經做10年，出刊120期。作品有合集出版ê作家有二個，一個是陳明仁ê《A-chhûn》、《Pha荒ê故事》；另外一個是清文ê《虱目仔ê滋味》。除了這二本已經有收--入-去ê作品以外，阮決定beh先編一本精選輯做紀念，嘛 beh見證定面所講ê精神，接續台灣文學ê傳統。

作者介紹

陳明仁：

I 是台語作家著作上濟ê一个，i 有豐富ê人生經驗，出世佇彰化縣足偏僻ê田庄，這段成長ê過程是i日後寫作台語文學上滋養ê肥底。

1988年創作台語劇〈許--家ê運命〉，到1991年tsiah 佇《台灣文藝》雜誌發表。1992年前衛出版社發行i第一本台語漢字kap羅馬字並用ê台語詩集《走揣流浪的台灣》，1995年台立出版詩集《流浪記事》，1996年出版《陳明仁台語歌詩》。仝年招有志創辦純台語文學刊物《台文罔報》，開始刊載短篇小說kap劇本，了後共遮的作品整理出版《A-chhûn》kap《Pha荒ê故事》。2002年金安出版社共i較有代表性ê詩、散文、小說、劇本編做《陳明仁台語文學選》。

1991年代為欲推行台語教育，捌受張榮發基金會邀請，翻譯日本『宮崎駿』banggah 7齣做台語發音錄影帶，路尾koh翻譯『叮噹貓』系列，由三映傳播發行。

I目前是：《台文罔報》雜誌社社長、李江却台語文教基金會董事，行政院客家委員會諮詢顧問。

Hōng-tin（丁鳳珍）：

女性，1970年佇彰化縣埔鹽鄉西勢湖庄出世，這馬佇台中教育大學台灣語文學系教冊，嘛是台語信望愛網站「台語家庭」專欄主筆。

A-bóng：

本名董耀鴻，三重埔囡仔，讀台北大同高中ê時創立台語文社團，去讀花蓮師範學院了後就留佇花蓮趁食。愛畫banggah，有創意，5％台譯叢書有收i ê 台語banggah作品集《羅馬字ê故事》kap《看啥》，捌佇《台灣囡仔報》開台語banggah專欄。

Ngá-kî（劉雅琪）：

少年查某囡仔，蹛三重埔，不止仔有寫作ê天份，可惜作品無蓋濟；有寫寡散文，捌做過《台文罔報》編輯。

洪錦田：

鹿港人。綿爛調查、收集語料。寫濟濟無仝格式ê作品，有發表佇台語文雜誌，猶閣真濟無發表；「台語文摘」捌共出版過台語散文集《鹿港仙講古》。

Voyu Taokara Lâu：

本名劉承賢，1975年6月14佇台北縣出世，爸母攏是嘉義人，毋過除去做囡仔ê時有兩冬蹛佇打貓lia̍h外，從到今毋管是讀冊抑是食頭路攏佇台北。

講起來i其實是讀財務出業--ê，開始認真學習Hô-ló寫作，是1996彼搭仔ê代誌。i上蓋有趣味--ê，是語文、歷史kap音樂。

Tōa-thâu X：

本名翁正良，1979年次。桃園平鎮Hak人（客家人）。2005年對東吳大學政治所出業。對1996年開始接觸台灣ê政治、文化kap社會運動，學習著真濟物件，嘛熟似著真濟同志kap好朋友，希望以後會使過仝款ê生活。

A-hi：

本名陳廷宣，竹北高中、真理大學台灣文學系出業。2006年海翁台語文學獎小說、散文正獎、2002年竹塹文學獎小說二獎、2003、2004年阿却賞小說二獎等等。作品集：（台語植物散文）《葡萄雨》。

詳細資料

序/導讀

關心卑微ê性命－－台語文學ê必要kap意義廖瑞銘

一種信念、一件行動維持十年，有需要做回顧kap驗收ê khang-khuè。《台文BONG報》已經做十年--looh，檢采有朋友beh問講：這份雜誌出刊存在ê意義是啥？我ê答案是：培養新一代ê台語文學作家，傳續台灣文學ê性命。

咱若觀察進入21世紀ê台灣文壇，就會發現一个事實是：除了前輩台灣作家lân-san發表ê作品猶看會著台灣、鼻會著台灣味以外，新生代作家ê hia-ê華文作品攏 kap台灣無siánn-mih關係！咱實在m̄知beh用siánn-mih角度去共in囥tī「台灣文學」ê名下來討論。遮的新生代作家上大ê共同點是：In大部份攏無leh使用台灣在地族群母語，當然in 嘛攏無法度去觀察ta̍k族群母語ê生活kap故事，koh較免講母語書寫。台灣文學這階段ê內涵欠缺，ka-tsài拄好有台語文學創作來補thap。

1980年代中期開始戰後新一波ê母語復振運動，嘛帶動台語文學創作ê發展。台語作品上大ê特色就是：In ê內容絕對kap台灣有關係，尤其是kap土地、人民有對話。無需要討論，就一定是台灣文學。M̄-koh，較失禮，一般平面媒體無人beh刊台文作品，尤其是有羅馬字--ê，koh較無人愛。所以，台文作家為著發表作品，就陸續發行真濟台語雜誌；期刊，《台文BONG報》嘛是其中之一。

當初發行《台文BONG報》，阮就堅持一个信念：beh做一份「台語文學專門雜誌」。所以，無愛刊論理性、運動性ê文章。真安慰，這个信念到今猶koh維持tī--teh。

《台文BONG報》自開始就有幾个較固定ê專欄，像：BONG報小說、BONG報選詩、BONG報戲劇，是基本ê文學創作：「台灣人寫真」是傳記文學；「tshìn話bóng thn̄g」是講一寡舊民俗、舊khiàn-sńg；「笑破人ê喙」台語創作笑話。第62期開始增加「HAKKA屋家」專欄刊登客語文創作。另外，A-bóng ê hàm-kó、洪錦田ê短篇推理、楊允言ê「來去花蓮」kap「農村生活筆記」、黃晴美ê「追想四二四事件」等等攏予人真深ê印象。

台語文學是有現代化ê文學，伊符合「文學現代化」兩個要點：一个是「語言kap書寫一致」；一个是「以市民生活經驗kap感情為主體」。發表tī《台文BONG報》ê作品嘛攏有合這兩項精神，tī每一篇作品--nih，毋但會當看著台灣，嘛會當感受著咱對每一个卑微性命ê疼kap關心，這tsiah是咱台灣文學傳統上寶貴ê特色。

《台文BONG報》已經做十年出刊120期，刊--過ê作品、作家數量歹算--a。作品有合集出版ê作家有兩个，一个是阿仁ê《A-chhûn》、《Pha荒ê故事》；另外一个是清文ê《虱目仔ê滋味》。其中，阿仁ê作品koh有研究生共提來做碩士論文ê研究。除了這兩本已經有收--入-去ê作品以外，阮決定beh先編一本精選輯做紀念，嘛beh見證頂面所講ê精神，接續台灣文學ê傳統。

常在有朋友leh問講，lín出這款雜誌beh予啥人看？哪會一定愛用台語寫，koh堅持beh用這款漢羅濫寫ê方式？十年來我用過幾lō種回應ê方法，親像「實踐手寫台語文ê理念」、「參考日文ê書寫方法」、「tī教育部猶未決定一套台語書寫系統進前，暫時用按呢」，m̄-koh朋友嘛攏無啥會當理解，最近我koh揣著一个無仝款ê理由，就是：「阮beh關心卑微ê性命，所以需要用這款語言來書寫，而且koh會使避開中文ê交纏，展現台語文學ê特色kap必要性」。可能朋友嘛猶m̄是蓋同意，m̄-koh，我家己無意中揣著台語文學koh較深沉ê意義。今教育部總算公佈一套台語音標，真濟人無藉口koh再講「因為音標無統一，所以i無法度學台語、進行台語文學創作」。Tī 這時，beh祈禱這本精選輯會當吸引較濟人進入台語文學，甚且進一步加入台語文學創作ê行伍。