紅帽á
Íng-kuè,有一个tsiok古錐ê查某gín-á,m̄管siáng看tio̍h伊lóng 真佮意,上愛伊ê人就是in阿媽,siánn-mih物件lóng mā挖挖出來hōo--伊,疼kah ná命--leh。
Hit-pái,阿媽hōo伊一頂絨á布thı̄nn ê紅帽á,因為tsit頂帽á kah伊tsiok sù-phuè,伊tsua̋n別頂lóng無ài戴,tsiū-án-ne ta̍k-ke lóng叫伊紅帽á。
有一日in阿母kā叫--來講:「紅帽á,你tsim tsiok聽。Kā tsia--ê 雞nn̄g糕kah酒the̍h去hōo阿媽,伊tsit-má破病,身體tsiok虛--ê,tsia-ê物件ē-sái hōo阿媽恢復元氣。Thàn天氣tshiu-tshìn ê時陣kín去,沿路tio̍h-ài khah有查某gín-á款--leh,m̄-thang tsáu入去樹林顧tshit-thô,sì-kè pha-pha-tsáu喔!你nā顧sńg kā玻璃kan-á摔破--去,阿媽會無thang食。去到阿媽hia,mā m̄-thang hònn-hiân,目睭sì-kè烏白siòng,ài先kā阿媽講gâu早喔!」
「我會照你講--ê做kah真好勢!」紅帽á伸手ài in阿母放心。Suah m̄知阿媽tuà真tiàu-uán,uì市區kiânn起ài點半鐘才會到樹林--裡,紅帽á人一下到樹林內底,就hōo一隻野狼tng--tio̍h。紅帽á m̄知野狼真歹心hı̄ng,當然m̄知thang驚。
「紅帽á,gâu早!」野狼kah伊sio-tsioh-mn̄g,
「你mā gâu早!」
「紅帽á,七早八早你是beh去tó-uı̄?」
「我beh去阿媽tau。」
「你ê hâ-kûn是phè siánn-mih物件?」
「是gún tsa-hng烘ê雞nn̄g糕kah一罐酒。我beh tsah去hōo破病ê阿媽食,án-ne伊就會khah kín好--起來!」
「紅帽á,恁阿媽tuà tı̄ tó-uı̄?」
紅帽á ìn講:「Uì 樹林tsia koh kiânn十五分鐘,阿媽tau就tı̄三tsâng大tsâng橡樹hia,厝外口ê樓梯kha有圍籬á,看--tio̍h你就知。」
歹心ê野狼心內暗暗á想:「這个查某gín-áinn看起來有夠好食款,tik-khak比hit个老--ê滋味koh-khah讚。Nā-beh kā in兩个lóng lia̍h來拆食落腹,tio̍h-ài用kuá計智。」
野狼就uá去紅帽á身軀邊kā講:「紅帽á啊!你看這樹林內底規sì-kè ê花hiah媠,你thài無愛去看花?我ioh,你tik-khak無去聽古錐ê鳥á唱歌--honn?你kan-na顧趕beh去看阿媽,bē輸beh去學校讀冊--leh,suah m̄知thìng-hó tiàm樹林se̍h-se̍h lau-lau--leh,有夠無彩--neh!」
紅帽á目睭thí kah大大蕊,看日頭光thàng過樹葉tı̄樹林內跳舞,sì-khoo-liàn-tńg ê花lóng開kah真ām真媠,伊就想講:「我nā bán kuá-á iū-koh媠iū-koh芳ê花去送阿媽,阿媽一定會tsiok歡喜--ê。Thàn時間iáu-koh早早,我kín來去樹林內底bán花。」
Tsiū-án-ne,紅帽á kiânn離開大路去bán花。Piān-nā bán一蕊花,伊就想講頭前一定有koh khah媠--ê,伊就koh向前--去,沿路bán沿路tshuē,愈行愈入--去。
野狼無tuè紅帽á入去樹林,tian-tò順大路直直kiânn來到阿媽ê厝!野狼kā lòng門,阿媽tı̄厝內問:
「Siánn-mih人tı̄外口leh lòng門?」
「紅帽á啦!我tsah雞nn̄g糕kah酒來,kín開門!」
「門sak--leh就開ah。」阿媽tı̄厝內huah講:
「阿媽人真虛,kha bē tsih力,khiā--bē起來。」
野狼uì門kînn kā門sak--leh,門就開ah,野狼一下入--來,直直kiânn uì阿媽ê眠床去,hm̍h-hm̍h無講話,大大tshuì就kā阿媽吞落去腹肚底ah。食了,野狼kā阿媽ê衫á褲穿--leh,kā阿媽ê帽á戴--leh,tó tiàm阿媽ê眠床頂,koh kā báng-tà-lî khiú kah好勢liu-liu。