灶雞仔
「灶雞仔」是我讀國民小學ê同窗ê兼好朋友,雖然畢業了後,因為種種ê原因,阮就真少見面矣,毋過,我猶是定定會聽著伊ê消息,想起伊ê代誌。
灶雞仔,當然毋是伊ê本名,其實伊ê老爸有共伊號一个誠體面ê名,叫做「李興華」。對遮,咱會當看出當初時伊ê老爸對伊,應該是有真大ê寄望。
到底伊後來那會號做灶雞仔?是啥人代先叫ê?我嘛毋知影,可能佮伊ê外表有關係。伊人生做細漢細漢、㾪巴㾪巴;面肉黃酸黃酸、頭毛又閣紅芽紅芽,看起來,就是一款營養不良ê模樣。
毋過,伊逐工元氣十足、精神百倍,行路總是沿路趒沿路跳,親像草蜢仔仝款。特別是,伊有夠愛呼噓仔,不管去到佗位,做啥代誌,差不多攏會聽著伊ê呼噓仔聲,毋但𠢕呼、又閣好聽。無看-過,實在真oh去想像,伊彼个細細个仔ê喙,那會當變出遐爾濟款無仝ê音樂出-來?彼種聲音,準講已經過去三、四十冬矣,到今,我猶是無法度放袂記。無定著,灶雞仔ê外號,就是因為按呢來ê嘛有可能。
佇一般人看來,特別是學校先生佮同窗ê心目中,灶雞仔百面是一个標準ê「歹學生」。
伊差不多逐工攏遲到、上課定定咧tuh-ku、三不五時偷逃學、作業毋捌準時交、成績永遠上尾名;猶有,無鉸指甲、無tsah手巾仔衛生紙、無洗身軀無換衫褲……會使講,所有「歹學生」ê條件,伊攏佔齊全。毋才講,有影是揣無人欲佮伊做伙。老師看伊無目地,同學嘛排斥伊,干焦我這个,人講ê「好學生」,顛倒佮伊較有緣。
我感覺,伊準講有誠濟問題,毋過,伊袂去kâng騙、袂去kâng偷;毋捌去欺負人、毋捌去傷害人,準講䆀,嘛䆀伊家己爾。
尤其是有一擺,班裡ê惡霸,彼个大箍仔「棺材邦」公開搶我ê物件,我較軟汫又閣無膽,毋敢佮伊輸贏。其他ê同學,有ê激恬恬、有ê準無看,無人敢喝聲、無人敢插手。
「物件還人啦!」逐家攏毋敢出面ê時,灶雞仔hiông-hiông徛出來講話。
「幹!外省豬仔!你講啥潲?」棺材邦看著灶雞仔竟然敢對伊嗆聲,感覺真意外、口氣誠歹聽,行到面頭前,出手共灶雞仔sak 一下倒siàng-hiànn。
「我幹恁娘!」聽著棺材邦先用話糟蹋,閣出手共拍,灶雞仔誶一聲,規个人對棺材邦ê腹肚心挵過去,棺材邦無張持,一箍人tǹg-lap坐佇塗跤。
「你該死矣!」棺材邦氣phut-phut,即時peh起來,紲手提一條椅頭仔對灶雞仔ê身軀頂hám落去。
灶雞仔人細漢,跤手猛掠,一閃身,顛倒來到棺材邦ê尻川後,跳上伊ê尻脊骿,兩支手像鐵箍共伊ê頷頸束牢咧。
棺材邦人大箍、身軀大欉,翻手想欲共灶雞仔giú-落,又閣giú袂落;出力想欲共灶雞仔hiù開,嘛是hiù袂開。不管伊按怎大聲叫、出力,灶雞仔就親像一隻土狗仝款,絚絚咬佇彼隻山豬ê頷頸,無欲放。
「幹什麼!」正當棺材邦開始面肉浮青筋、目珠吊白仁,眾人攏驚kah毋知欲按怎ê時陣,老師hiông-hiông傱入來,大力喝一聲,趕緊共兩个giú乎開。兩人先予老師𤆬去辦公室。聽講,一个人先摃十个尻川䫌,紲落來,上課ê時,閣hông罰去跪佇教室頭前,講台ê 兩爿。
棺材邦跪佇倒手爿,伊ê人大欉又閣粗勇,規个面臭konn-konn、懊tū-tū,看起來足毋甘願ê樣;灶雞仔跪咧正手爿,伊生做細漢又閣薄板,一箍人無意無意、無神無神,應該是感覺無聊ê款;老師徛佇台仔頂氣phut-phut,一下仔斡頭看兩个,一下仔斡頭看阮逐家,一直罵、一直念……
看著這款情形,我無張持想起早前捌佇廟裡,看過ê城隍爺佮邊仔ê七爺、八爺,雖罔ê身材、體格無相仝,毋過彼款氣氛、心情差不多。
放學了後,我佮灶雞仔做伙轉去。伊正爿喙䫌小可凝血、兩支手骨幾跡烏青,毋知是去予棺材邦拍著,抑是去予老師摃ê?伊今仔日先佮同學相拍閣予老師體罰,毋過,看起來若像無啥要緊,規路照常跳伊跤步、呼伊噓仔,閣招我禮拜佮伊去掠蟋蟀仔。
就按呢,阮兩人變做上好ê朋友。我分伊衛生紙、教伊寫作業,請伊食sì-siù;下課ê時,做伙𨑨迌;放學以後,鬥陣轉去;連歇假,嘛相招四界去löng-liú-lian。
彼擺事件了後,班裡,包含棺材邦在內所有ê同學,就無人閣敢欺負我矣,嘛無人敢佇灶雞仔ê面頭前講伊ê歹話。毋過,當私底下咧鄙相伊「外省豬仔」ê時,我喙裡雖罔毋敢為伊出聲、替伊講話,心內猶是感覺真艱苦、誠毋甘。