歡喜看著陳義仁牧師的《宝島素描簿》

李南衡

　　日本現代一位真重要的畫家東山魁夷先生(1908-1999)，佇伊的散文集《及風景對話》內底，講伊不管時攏有一本素描簿隨身。看著一個景，就將伊所看的、所想的、所感受的畫落來，有可能對無仝的時間、無仝的角度、無仝的心情畫三四張素描，轉去厝裡才提出來看，慢慢畫出一張大張的畫，有可能是水彩、有可能是油畫。伊的大張作品無論是參加比賽抑是個人展覽，攏得著真濟的好評。總是，伊講伊上寶貝的是遐的無提出來展覽、無賣人、無互人收藏去的素描，因為遐的素描，上會當看出伊看著一個景彼當時的真實感受。

　　咱真感謝陳義仁牧師將伊上寶貝的一張一張素描，配一寡文字來說明，互咱佇伊的素描簿內底，感受著寶島的媠(美)。好佳哉陳義仁牧師無用遮的素描做底畫出大幅大幅的畫參加展覽、比賽、互人收藏去，所以無給上好的素描提去藏、收去匟，咱今仔日才有即個福氣欣賞伊的素描簿。

　　全世界所有偉大的作品，無論是音樂、繪畫抑是文學，創作者的營養及靈感攏是對伊的土地吸收的。咱台灣的音樂家蕭泰然教授，佇一遍演講的時，講伊創作的營養是對原住民的八部合音、歌仔戲、台灣各地方民謠來的，講伊若無台灣即塊土地互伊的營養，伊實在無法度創作啥物好的音樂作品，蕭教授的作品會當佇海內外遮呢受歡迎阿佬，就是因為有台灣的芳味。俄羅畫家Chagall的營養對伊的猶太人鄉親、伊出世及生活的俄羅彼塊土地吸收的。伊畫剃頭師傅、畫做穡人、畫猶太人娶新娘的風俗、畫囝仔時代看過的馬戲團、畫散鄉猶太人的宗教信仰及日常生活。伊若無遮的營養，絕對無可能變成世界級的畫家。今仔日佇台灣，有人未學行就欲學飛，台灣話都猶講bue好勢，就欲學英語，講按呢號做國際化，實在是幼稚到無藥、無知到有剩。

　　日本畫家東山魁夷先生滿四界去滿四界畫，不但行過真濟伊所生所長的日本各所在、伊青年時代所留學的德國，伊亦去奧地利、法國、中國旅遊畫圖。陳義仁牧師佇即本冊內底提起美國畫家魏斯，「有的人畫圖，對台灣畫到世界各地，有的人只有卡愛畫家己的故鄉。我講這，無價值判斷。是干單欲講，有的人親像魏斯，只有欲畫自己愛戀、家己有強烈情感的物件，所以作品通常也是感情強烈的。」其實陳義仁牧師的畫及文字，會使講攏是素描。陳義仁牧師的筆所畫所寫的是伊熟似的人、物、景，亦攏是台灣的。無管你有合意抑無，伊描畫的拍鐵仔師、刻佛仔師、修理皮鞋師父、拍拳頭賣膏藥的，一個共同的特點就是認真拍拼。陳義仁牧師活佇現此時的台灣，伊當然關心住佇台灣的各種人，伊給平埔族、福佬客、原住民、外省人，以及新住民外籍新婦做素描，為咱留落一項真好的紀錄。陳義仁牧師是一個普通人，親像烏甜仔、山茼蒿仔、菜糜，伊會懷念；互人剉掉的一欉樹仔，伊會不甘；三塊招牌的店仔、產品介紹會、廟及廟埕、博老人繳仔、檳榔西施、挽面的阿忍、流動夜市仔、婚宴康樂隊、黃昏的故鄉，遮的人看不上目的，伊給準作寶來畫來寫。陳義仁牧師是民間音樂的愛好者，伊描畫唱南管的、世界上媠的北管藝人、挨弦仔師、彈月琴的人、鋸琴師，種種可愛的民間藝人。伊亦真愛聽外國民謠，所以來台灣演唱的Marta Sebestyen & Muzsikas伊會走去聽，亦利用即個好機會給畫起來。陳牧師一向無興油臊、較愛食素素仔的菜，音樂亦仝款，若是加工過、加傷濟芳料、失去原味及土味的，伊就較無趣味。「烏克蘭兒童合唱團」來台灣，「對海報看怹身穿刺繡刺到媠咚咚，表現民族特色的服裝，我想講我會聽著較自然的發聲。」伊就走去聽。牧師娘知影伊真揀食，「岡山演唱會煞，阮某講我一定真失望。因為這是較倚近西洋聲樂的發聲。」

　　看著《優秀的，先死》即篇文，提起一九八○年新的二二八事件了後，伊先畫即張素描，才照即張素描創作出林義雄先生的老母及兩個雙生查某子，媽孫仔彼張木版畫，當時彼張木版畫互真濟雜誌及冊提去使用(假那攏無版權)。佇彼當時足恐怖的氣氛下面，陳義仁牧師來台北尋我，提即張版畫互我看的時，我真感動，伊所做的及伊的名仝款──義仁，佇陳義仁牧師瘦閣薄板的身軀，看出伊滿腹的熱火及疼心。

　　看陳義仁牧師即本《宝島素描簿》，內容親像伊本人，素素矣，那像一壺一般台灣老百姓(常民)所飲的茶，不是貴蔘蔘的比賽茶、亦不是摻一寡香料的各式花茶。價數無懸、品質誠純的春仔茶，慢慢仔飲，清心潤喉止渴，飲了嘴尾甘甘。對我來講，猶有去油臊、消氣化痰的功效。

(本文台語用字，有極小部份及本冊無仝)