序一 黃震南(藏書家、本土語文教師)
彼工收著雅菁寄來的冊稿,予我真歡喜。世界有名聲的故事《小王子》,雅菁共伊翻譯做台語文矣!
其實佇台文界,無人聽過雅菁的名號。理由真簡單,因為伊佇翻譯《小王子》進前,根本毋捌寫過台文作品。這完全是伊家己骨力、綿爛學習的成果。
欲教小王子講台語進前,雅菁家己愛先學台語。伊無蹛台灣,佇伊彼搭無人會當佮伊講台語,伊就用細漢使用母語的記持,共家己的話若揫索仔咧揫轉來:先讀《小王子》原文,才用伊家己的母語講一擺,閣用教育部的台灣閩南語常用詞辭典揣出正字,按呢一字一字、一句一句,教小王子講台語。
教小王子講台語的過程,其實就是教家己講台語,小王子佮翻譯者的形影敢若敆做伙矣。敢講毋是?《小王子》的故事,就是一直探險佮成長的旅途,佮已經予華語洗腦甲蓋徹底的咱這代,這陣才想欲共台語抾轉來,又閣揣無先的通教,只好佇各種台語字典和網路資源那做那學,實在足成的。
雅菁共冊稿寄予我的時,其實伊已經共小王子(嘛是伊家己)教台語教甲真透機矣,毋過伊猶閣無放心,央我鬥審訂用字。我嘛是不止仔家婆,對頭到尾斟酌共稿巡一擺。因為伊本來就逐字去查過,用字袂去重耽,我修改的攏是一寡語詞佮語法,若有淡薄仔「阿啄仔款」抑是「華語形」,就共伊建議修做較正港的講法。譬論「伊恬恬佇一山坪空的佮一山坪猶袂開的酒矸仔頭前」,這種遮爾長的語句,可能是對外國原文直接翻過來的,毋過咱台語通常會共切做兩句講;有的詞我嘛刁工共伊替換一下,展出語言的多元佮活潑,本土味嘛較厚,「喘一口氣」我就改「歇喘」,「裝巧」(假影家己真聰明)我就改「假博」,「真細」我有的就共改做「細粒子」按呢。
雖然講九成以上,猶原是雅菁寫的,我干焦淡薄仔調整咧爾爾,毋過規本冊讀過巡過,嘛了真濟時間。就可比小王子共狐狸「教乖」,我了精神、落工夫佮「小王子」鬥陣、盤撋,去讀有伊的意思,才查字典去揀一个我感覺上適合的語詞去共鬥峇。到尾仔,《小王子》的文字有我的氣口,我嘛佇審訂的過程中,查著誠濟媠氣的古早話,互相影響。莫怪講小王子教狐狸教到最後,兩个人攏需要對方,對方攏是獨一無二的。
台語的復興,就是按呢的過程。這本《小王子》可能對你來講無好讀,有的字會予你頓蹬一下,有的詞可能從到今都毋捌聽過。毋過無要緊,沓沓仔你會感受著語言的媠,下愈濟工夫去讀、去聽,就愈會當體會語言的重要性──「你為著你的玫瑰所消磨的時間,才予你的玫瑰變甲遐爾重要。」
我向望各位朋友咧讀這本《小王子》的時,毋但欣賞故事的新奇趣味,嘛因為這本冊,予家己的台文旅程開始起行,就親像咱可愛的小王子仝款。
/////////////////////////////
序二 毋驚孤單來起飛 鄭順聰(作家)
代先,你著愛做一个正港的囡仔,共「大人」彼不答不七的臭彈囥一邊,予「囡仔性」無站無節;紲來,你就愛共飛行員和小王子所說的故事當做誠實的,「有耳無喙」毋是咧罵人,是講古的才調;落尾,緊走轉去你的「祕密基地」,毋管是拋荒真久,或者拄起好蓋燒烙,《小王子》上內底,有物仔當咧呼你。
孤單。
因為孤單,所致,佇咱性命的時間之流無停煞的某一个歇喘,《小王子》就會出現,看顧咱的祕密基地,講彼無站無節的故事,飛過一粒一粒的星球,享受做囡仔的自由無束縛。
咱著來認捌孤單。
佮意小王子,咱有五億一百六十二萬兩千七百三十一个理由(生理人算出來的),讀台語版,排頭位的理由是:媠氣。
活靈靈的台語,予故事內的人和動植物夠鋩夠角;台語的氣口是蓋濟款,論說事項真好勢,帶特殊的氣味;上活潑的是對話,若親像人就佇厝邊頭尾,有來有去有影是媠氣。
按呢無夠,台灣有史以來第一本刊印出來的台語《小王子》,閣有專業配音老師的唸讀,毋但做台文的輔助、教材的補充,閣較成廣播劇,是聲音的精彩表演,讀者通聽著台語的聲韻變化,閣有心情和感情的展現。
會當講,前衛版的《小王子》的確是飽滇掛齊勻。
佇台語標準化徛起、勻勻仔湠開的拄起步,外國經典的翻譯不止仔重要。《小王子》進前已經有《悲慘世界》,閣較早嘛有蓋濟無仝文字系統的翻譯。而且踮網路頂,上無有三个版本的台譯《小王子》,閣有濟濟人當咧翻或者是想欲翻……恁看著的這个版本,才拄起步。伊毋是十全的,內底足濟字句愛閣斟酌,加減有寡翻譯腔、華文氣。就配音來講,干焦是優勢腔,唸予端的貫串爾爾,向望未來的台譯《小王子》,有無仝腔口的配音(小王子按別星球來的,敢會和飛行員仝腔?)
才起步爾爾啦!可比幼穎仔拄暴出來,家己想欲翻、想欲配音的恁,定著愛蹽落去,你看華語幾若十種的版本,就無人嫌濟。台語的氣口和腔口百百款,你嘛會當來翻,予台譯《小王子》毋但是一粒星、兩粒星,是滿天的星閃閃爍。
想起我做囡仔時,文化環境猶毋是蓋好,課本掠外,厝裡就無別項冊矣。有一工,毋知佗一位親情的半本《小王子》送予阮兜,散學轉厝無聊時,我就掀來看,看到小王子欲去遠兜的行星弄險時,頂集就煞矣。
我就真好玄,直直咧想彼小王子後來拄著啥物人?發生啥物代誌?佇我頭殼內底咧遨,咧想,愈想愈遠,愈想愈譀,我的文學想像,就是按呢成的,是半本《小王子》牽成的。
無疑悟,我的文學弄險,毋但拄著小王子,閣用我的母語來說分明,有影是世界歡喜。
紲落來,掀到後一頁,翕QRcode放聲出來,坐飛行機來起行。佇咱性命的時間之流看無盡磅的彼爿面,咱就欲和講台語的小王子見面囉!
內容連載
第2章
我家己一个人的日子過六年去,也無啥物人會使真正佮我開講,一直到六年前,有一擺飛行機佇撒哈拉沙漠(Sa-ha-lah sua-bo̍k)歹(pháinn)去。有啥物物件卡佇我的ian35 jin51內底。因為我毋捌𤆬師傅、嘛毋捌載別人,我就愛家己一个罔試看覓,遐歹修理毋知影創會好勢無。對我來講這是一件拚生死的大代誌。我賰的水干焦有夠啉(lim)八工爾爾(niā-niā)。
頭一暝(mê/mî)我佇偏僻的沙漠中睏去,四箍輾轉 (sì-khoo-liàn-tńg)攏無半个人影。我比跋落海浮佇竹棑仔頂懸(kuân)的人閣較孤單。透早天拄光的時陣,去予一个足細的聲音共我吵精神,恁(lín)免想嘛知影我有偌(guā/luā)驚惶(kiann-hiânn)。伊講:
「請你畫一隻羊仔予我!」
「啥貨?」
「畫一隻羊仔予我!」
我掣一下煞趒起來,親像去予雷舂著。我共目睭挼(juê)挼看予斟酌,見著一个足古錐的囡仔人掠我金金看。這就是我落尾畫伊的上媠(suí)的一張像,毋過我畫的當然無伊本人遐好看。這袂當怪我。自六歲的時陣,大人共我想欲做畫家的志願潑冷水了後,我就無閣咧學畫圖矣(--ah),除了會曉畫看會著腹肚內佮看袂著腹肚內的錦蛇爾爾。
我驚甲目睭擘予開開,斟酌看這个人影。毋通袂記得我彼个所在四箍圍仔無半个人蹛。毋過這个囡仔人看起來敢若(kánn/kan/ka-ná)毋是揣無路,嘛無像忝(thiám)甲欲死抑是枵(iau)甲欲死,閣無像會喙焦(tshuì-ta)抑是驚惶。伊看來完全毋是佇四界無半个人蹛的沙漠內摸無路的囡仔人的款。佳哉(ka-tsài)尾仔我會當講話矣,我共問講:
「你是佇遐咧創啥?」
伊輕聲細說(khin-siann-sè-sueh)閣共我問一擺,袂輸佇咧講足重要的代誌:
「拜託一下……畫一隻羊仔囝予我……」
代誌若是傷(siunn)過神祕,咱(lán)就無法度無去遵守。四箍圍仔無半个人、又閣有性命危險,雖然感覺按呢做實在真好笑,我嘛是對(uì)褲袋仔提出一張紙佮一枝筆。毋過我想著家己干焦讀過地理、歷史、數學佮文法,所以就共伊講我袂曉畫圖(想著就真無爽快)。伊應講:
「無要緊。畫一隻羊仔予我。」
因為我毋捌畫過羊仔,我干焦會當畫家己會曉畫的兩種圖的其中一款予伊,就是腹肚大大圈(khian)的錦蛇。聽著這个囡仔人共我應的話,我感覺足意外的:
「無愛!無愛!我無愛錦蛇腹肚內的象。錦蛇夭壽危險,象又閣傷過粗重。阮兜(tau)內底足細的。我干焦愛一隻羊仔。畫一隻羊仔予我。」
我就畫矣。
伊看甲足斟酌的,閣講:
「無愛!這隻病甲誠嚴重。閣畫一隻。」
我閣畫矣。
我心內微微仔笑,有小可仔(sió-khuá-á)歡喜。
「你家己看予真……這毋是羊仔囝,是一隻羊犅(káng)。伊發角lioh……」
我又閣重畫。
佮頭前幾張仝(kāng)款,這張伊嘛是講袂使:
「這隻傷老,我欲愛一隻活較久的。」
我已經無耐性矣,因為足趕緊欲開始來共我的ian35 jin51剝掉,這張圖我就凊彩(tshìn-tshái)畫畫咧。
我共講:「這是一个盒仔。你欲愛的羊仔佇咧內底。」
想袂到我這个囡仔評審(phîng-sím)煞來喙笑目笑:「這拄仔好是我想欲愛的!你看這隻羊仔敢(kám)會食足濟草仔?」
「為啥物按呢問?」
「因為我蹛的彼位足細的……」
「草仔一定有夠伊食的。我畫予你的羊仔足細隻的。」
伊頭敧(khi)敧看著彼張圖:
「嘛毋免遐爾細隻……你看!伊睏去啊……」
我就是按呢才來佮小王子熟似的。